我女友最近動了所謂的 “LASIK” 激光矯正視力手術。因為之前發現網上對此感到迷茫、唔知做好唔做好的人甚多。經她同意下將她的心路歷程轉載於此，讓其他人作參考之用。
前言：她做的LASIK（Laser-assisted In Situ Keratomileusis），就是所謂用激光矯正近視及散光的手術。執行手術的是她同事介紹的一位林姓醫生，極有經驗云云。我女友的近視度數約為五百度，另加散光一百多度。在手術前的檢查中，醫生認為她的角膜厚度不足，要用上較準確之Intralase。兩隻眼「全包套餐」總費一萬八千元。
D Day 手術當日：
之前都無乜野，去到呢日我就開始後悔喇。點解要咁做黎傷害自己對眼呢？上到手術床，就更胡思亂想：點解對自己雙眼咁唔負責任呢？我又開始覺得自己對唔住自己父母（身體髮膚受諸父母嘛！）、對唔住自己、對唔住神！（Gan註：佢無信教架，呢個應該係胡思亂想嘅一部份 :roll:）我會唔會就咁盲左？我將來老左有白內障或者青光眼個機會會唔會大左？越諗越不安！就係呢個時候我見到一個白色嘅圈係我眼前，然後佢地開始落suction落我對眼度！Ouch!! 好好好好痛！跟住視力開始模糊！乜事？好驚！跟住醫生先話啲suction會令我視力模糊一陣，咁都鬆一口氣。我知道之後個步驟係用Intralase切開我個角膜…… Well, 呢一步又唔係咁痛喎，但係當個醫生掀起塊角膜時就好唔舒服…… 我個心不停咁希望個手術快啲完。
唔清楚過左幾耐，手術第一部分（Intralase）就完左。我去返間休息房度稍休，因為要等對眼吸收返頭先界角膜時產生嘅氣泡。間房入面仲有三個同樣做手術嘅女仔，都係休息緊，都係好似我咁咁蠢為靚而搏命
（Gan註：我當時係出面等緊，發現全部病人均為女性）。不過點都好，都叫有個伴，無咁擔心。對眼好矇，間房好似蒸汽房咁，我相信白內障病人睇野都會係咁。無幾耐護士就過黎check下對眼，同埋滴眼藥水，準備second section！
護士帶我去返手術室。我見到手術床旁邊有班medical staff「磨刀霍霍等開我刀」。唉～好想個「惡夢」快啲完呀…… 然後醫生好溫柔咁叫我望住佢頭上個紅點，又話會捉實我個頭等我唔好亂郁，要我放鬆唔好驚。唔，果然係老手，個心又定啲。點都好開始第二部分啦…..
Oh my goodness!!!!!!!! 唔怪之得要捉實我個頭啦！佢地好似用支有鈎嘅stick「了」開我塊角膜！超級霹靂無敵勁痛同埋唔舒服！
「…請你望實個紅點同埋唔好dup低頭，我地需要你嘅合作…..」醫生突然咁講。我即刻暫停亂諗野，返回現實繼續受苦。然後我聞到果股傳說中嘅「火羅 味」！佢地開始「燒」我對眼喇！我忍住呼吸去唔聞陣味兼令自己唔好亂郁。好快就燒完，醫生又用支野合返埋個角膜，又係超級霹靂無敵勁痛同埋唔舒服！
好不容易．終於．完成左…… 一隻眼，仲有另一隻！呀呀呀呀呀呀呀～～～～～～～
「搞掂喇，手術成功！」我迷迷糊糊聽到醫生咁講…… 成功搞掂！多麼美好動聽的語句啊！從未試過聽到一句說話令我咁開心！
之後護士幫我「痴」保護眼罩，又休息左大概十多分鐘就走人。走到街上，彷如隔世。個人好累，好似做完運動咁，我知道因為手術時我個心跳得好快。立刻打的返屋企，食左少少野就訓。起身時約六點，發現隻左眼開唔到！因為太多「眼屎」。即刻打返去問下，個護士叫我拑實下眼皮再慢慢開上眼皮…… 又得喎。我估計視力大概回復左八成。之後又走左訓過……
D+1 Day:
對眼唔痛，但仲係矇。約有八成半視力啦。我晨咁早就返去醫生自己診所度覆診（同做手術係唔同地方）。佢check左大概三分鐘，話無乜大問題，著我呢幾日好好休息。不過因為無太陽眼鏡，所以之後行左陣旺角買黑超去保護對眼……
D+2 Day:
今日又好返少少，大約九成視力啦。無痛。
D+7 Day:
今日唔知咩事，本來好得七七八八嘅眼又突然矇返，仲差過做完手術果日！我即刻打返去問下，個護士話係正常喎…… 唉，希望真係啦。又開始罵自己呢幾晚唔應該挨夜……
D+8 Day:
又好似好返啲咁喎。唉…… 暫時都無complications，已經算係一大大大幸喇。
就記住咁多先啦。